The team concept in community health care.

Gesondheidswerkers is bewus van die konsep en voordele van spanwerk maar in werklikheid word die beginsels daarvan selde toegepas. Deur spanwerk word die kennis en vaardighede van elke lid saamgevoeg om die mees effektiewe oplossing vir ’n pasiënt se probleem te vind. Dit is noodsaaklik dat elke lid aanvaar word as individu wat ’n unieke bydrae kan lewer. Die geneesheer is tradisioneel die leier van die gesondheidspan en te dikwels word die pasiënt se probleme volgens sy plan hanteer. Die verpleegkundige moet egter besef dat sy haar eie vaardighede het en moet bereid wees om die verantwoordelikheid daarvoor te aanvaar. Vir die geslaagde oplossing van pasiënte se probleme moet duplisering en 'n gebrek aan kommunikasie en koórdinasie in die span voorkom word. Weens volgehoue skakeling met die pasiënt en sy gesin is die gemeenskapsverpleegkundige in die ideale posisie om as koórdineerder vir die gesondheidspan op te tree. Met die uitbreiding van gesondheidsdienste en toenemende spesialisering kan een persoon nie alleen die komplekse gesondheidsprobleme van die pasiënte hanteer nie. Spanwerk moet ’n praktiese werklikheid word om ’n holistiese benadering tot gesondheidsorg te verseker.